“Dit was ‘n verskriklike ding. Daar was ‘n ontploffing, en toe ‘n tweede ontploffing. Dit was iets wat ek in my lewe nog nie gesien het nie.”
Só vertel Ronel Janse van Rensburg, oor die angswekkende gesig toe die huis in Conroystraat, reg langs die huis waar sy en haar pa en sussie woon, Saterdagaand net voor 22:00 afgebrand het. Ronel het aan Gazette vertel dat sy die aand omstreeks 21:45 besig was met ‘n oproep toe sy die slag gehoor het.
“Ek het dadelik geweet iets verskrikliks het gebeur, en na buite gehardloop.”
“Toe ek buite kom het ek net een bol vuur gesien. Ons het aanvanklik gedink dat daar ‘n man, vrou en babatjie in die huis was.”
Die polisie het egter intussen bevestig dat daar ten tyde van die brand niemand in die huis was nie.
Hoewel daar baie vinnig hulp op die toneel was, kon niks gedoen word om die verwoestingspad van die vlammesee te stuit nie.
Die polisie ondersoek brandstigting.