Teen Gazette se druktyd kon nog geen bevestiging gekry word oor wanneer die skade aan die R59 buite Parys naby die dorp se vliegveld, herstel sal word nie. Die teervlak is Saterdagoggend, 19 Maart beskadig toe twee vragmotors in ’n kop-aan-kop-botsing betrokke was tussen Wolwehoek en die vliegveld.

Albei vragmotors het weens die impak van die botsing aan die brand geslaan. Een van die vragmotorbestuurders is op die toneel oorlede, terwyl die tweede vragmotorbestuurder in ‘n kritieke toestand na ‘n Bloemfonteinse hospitaal vervoer is, waar hy Sondag aan sy beserings beswyk het. Die vragmotors het na wat verneem is, onderskeidelik papier en gruis vervoer.

Die botsing het Saterdagoggend net na 05:00 gebeur, en die pad was tot laat die middag gesluit omdat die smeulende wrakke, en geweldige hitte op die ongelukstoneel, as gevolg van die brand, opruimingswerk bemoeilik het. Die wrakke moes stuk vir stuk losgesny en wrakstukke toe met ’n hyskraan opgetel en van die ongelukstoneel verwyder word.

Die pad kon eers daarna skoongespuit en weer vir verkeer oopgestel word. Verkeer is herlei, en opruimingspanne was nog tot laat die middag op die toneel.

Verskeie motoriste het ná die botsing hul kommer uitgespreek oor die skade aan die teervlak, en gesê dat hul vrees dat dit nog botsings sal veroorsaak.

Daar was reeds Maandagoggend ’n botsing reg by die toneel waar die vragmotors Saterdagoggend gebots het. Gazette het Dinsdagoggend verneem dat gesprekke onder meer met Sanral gevoer word om te probeer om die pad te herstel.