Tydens Operasie Reetsa wat onlangs deur polisiereserviste gedoen is, het hulle op die afgekapte hand van ’n aap by ’n verdagte afgekom.
Volgens ao. Mpho Manyoba van die polisie is drie mans in Markstraat in hegtenis geneem vir die gebruik van alkohol op straat.
Die mans is in die selle deursoek toe daar op die afgekapte hand van ’n aap afgekom is. Die hand is saam met verskeie ander klippe en kruie gevind. Volgens Manyoba is dit nie duidelik waarvoor hulle die “muti” wou gebruik nie.
’n Man en ’n vrou is ook in hegtenis geneem vir die besit van onwettige middels. Volgens Manyoba het hulle baie baklei toe die polisie op hulle afgekom het. Die vrou het gesê sy wil ’n saak van aanranding teen die man maak. Die man het haar polisiestasie toe geneem om ‘n saak aanhangig te maak, maar toe hulle daar kom, het die man vir die polisie gesê dat die vrou eintlik ’n dwelmhandelaar is.
Die polisie het die leidraad opgevolg en die twee na hulle huis in Weyersstraat vergesel. Die huis is deursoek en daar is leë plastiese sakkies, asook gebruikte spuitnaalde gevind. Hulle is albei in hegtenis geneem. Hulle het Maandag in die hof verskyn. Die man is op borgtog vrygelaat, terwyl die saak teen die vrou teruggetrek is.
Drie mans is ook in MC Rooderylaan in hegtenis geneem op aanklag van die onwettige besit van dagga, terwyl een persoon vasgetrek is op aanklag van bestuur onder die invloed op die Carletonville-pad. Die operasie is onder leiding van permanente polisielede gedoen en het Ventersdorp, Ikageng, Buffelshoek en Potchefstroom ingesluit. Dit het Saterdag tussen 16:00 en 00:00 plaasgevind.
