Wêreldbiddag vir Vroue sal Vrydag, 4 Maart ook in Parys gevier word. Dit word om 17:30 by die NG-gemeente Parys-Oos gehou, saam met die optrede van Charlie Dicks. Die tema is: Hy weet wat Hy vir jou beplan, na aanleiding van Jeremia 29:1-14.
Met die jaarlikse biddag kry Christenvroue in meer as 170 lande die geleentheid om bymekaar te kom om saam te bid. Die geleentheid bring vroue van alle rasse, kulture en kerke saam om vir vrede en geregtigheid te bid. Elke jaar word daar gefokus op ‘n ander land met ‘n unieke tema, en word die biddag op die eerste Vrydag in Maart gehou. Die gebruik dateer uit 1887 uit die VSA. In Suid-Afrika is die eerste Wêreldbiddag in 1930 in Seepunt, Kaapstad, gehou. In 1946 is die nasionale komitee gestig wat jaarliks die biddag in Suid-Afrika reël. Elke jaar word daar ‘n land aangewys om die program saam te stel en te fokus op gebedsake in hul eie land.
* Die Wêreldbiddag vir Mans word Saterdag, 5 Maart om 07:00 by die NG-gemeente Parys-Oos gehou. Ivor Swartz, ‘n dinamiese gelowige met ‘n mooi getuienis, sal as spreker optree. Toegang vir beide gebedsgeleenthede is gratis.. Almal welkom.
