Dit is vyf jaar later, maar Suid-Afrikaners onthou steeds die bekkige witkopseuntjie van Parys met die Chappies-hemp op die Radio Raps Show.
Trouens, die humor in dié insetsel is al meer as ‘n miljoen keer op YouTube gekyk en word steeds gedeel.
Vanjaar is Herman van der Schyff in graad 4 by Parys Primêre skool, maar steeds herken mense hom waar hy gaan as die knapie wat so lekker kon gesels oor geelvis vang, krieket en super heroes, en sy wyshede as dit kom by meisies. Só is hy nou die dag weer in Potchefstroom raakgesien toe hy sy vriende langs die sportveld aangemoedig het.
Sy sêding: “Jiss, ek lovit”, is destyds deur die PUK-studente ‘n WhatsApp-plakker gemaak wat ook steeds die rondte doen.
Maar klein Harry, soos sy gesin hom noem, is ‘n doodgewone rabbedoe wat van krieket hou en hom min aan die bekendheid steur wat hy oornag gekry het. Verlede jaar is hy weer genooi om op Radio Raps te gesels, maar inperking het die beplande opname in die wiele gery. Intussen sit die YouTube-insetsel steeds glimlagte op mense se gesigte oor die jongman wat so gemaklik voor ‘n kamera kan gesels.
As jy nie die insetsels gesien het nie, gaan kyk gerus na https://m.facebook.com/watch/?v=2652242901509591
