Eskom se gedwonge munsipale beurtkrag vir Ngwathe is uiteindelik amptelik iets van die verlede. Die Hoogste hof van Appél het Vrydag in Bloemfontein ná ’n hofstryd van langer as ’n jaar Eskom se appél met koste van beide die advokate van die hand gewys, toe daar ten gunste van die Lekwa Belastingbetalersvereniging en die Vaal River Development Association (VRDA) beslis is oor die toepassing van gedwonge munisipale beurtkrag in die Lekwa en Ngwathe munisipaliteite. Die uitspraak beteken dat verbruikers in hierdie munisipaliteite nie langer gestraf sal word vir die munisipaliteite se onvermoë om hul diensterekening aan die kragreus te betaal nie.

* Adv. Herman van Eeden (SC) en adv. Danie Wijnbeek, met Lou van Wyk as opdraggewende prokureur vir die Vaal River Development Association (VRDA), en Andreas Peens vir die Lekwa Belastingbetalersveriging onderskeidelik, verdien ‘n pluimpie vir die werk wat gedoen is om die saak voor die hof te kon bring wat verreikende gevolge inhou vir munisipaliteite wat hulle in soortgelyke situasies bevind waar strafbeurtkrag van tyd tot tyd toegepas word.