Al meer kliënte maak nou gebruik van kontaklose betalings danksy die Covid-19 pandemie. Só sê FNB wat ‘n 1,000% jaar-op-jaar groei in betalings via slimtoestelle gehad het.
Die bank sê al meer mense verkies skynbaar om kontantloos rond te beweeg en eerder betalings te doen via slimtoestelle met digitale beursies wat deur FNB Pay ondersteun word soos Apple Pay, Samsung Pay, FitBit en Garmin, asook FNB virtuele kaarte, QR-kodes (scan to pay) of die sogenaamde raak-en-betaal (tap to pay) metode. QR-kode betalings het met 40% togeneem en raak-en-betaal met fisiese bankkaarte het met 85% jaar-op-jaar gestyg. Kontantonttrekkings daarenteen het met 11% afgeneem.
FNB sê die migrasie bied bankkliënte ‘n wyer keuse van betalingsopsies op die digitale platform, en dat nuwe betalingsmetodes verbruikers en handelaars verbeterde sekuriteit en gerief bied met betalings. Ten spyte van die groei in digitale betalings, sê FNB is daar egter steeds nog ruimte om die afhanklikheid van kontantbetalings te verminder.
