Kol. Adéle Myburgh, polisiewoordvoerder in die Noordwes, het bevestig dat die voorval om 13:20 naby die dam-area plaasgevind, berig Venessa van der Westhuizen. Die meisies wat betrokke was, was ‘n NWU-student en drie van haar vriendinne wat van Pretoria by haar gekuier het. Volgens Myburgh is die man later as Solomon Motshabi (33) identifiseer. Motshabi het een van die meisies uitgesonder en haar opdrag gegee om haar drie vriendinne by ‘n brug in die omliggende area vas te bind. Hy het dieselfde meisie gedwing om saam met hom in sy kar te klim en Bult toe te ry waar sy vir hom geld sou trek, nadat hulle die man kon oorreed om hulle nie seer te maak nie, in ruil vir geld.

Terwyl hulle weg was, het een van die vriendinne losgekom en haar ma geskakel wat Mooirivier Beskerming geskakel het vir hulp. Nadat die sekuriteitsbeamptes die sekuriteitskameras op die Bult dopgehou het, is die man se voertuig opgemerk. Die meisie het die geld getrek, maar voor sy dit aan hom kon oorhandig, het die sekuriteitsbeamptes op die man toegeslaan en hom in hegtenis geneem. Hy is later aan die polisie oorhandig. Behalwe vir skraapwonde is die meisies nie beseer nie. Motshabi het Maandag in die Potchefstroomse landdroshof op ‘n aanklag van poging tot roof en vier aanklagtes van menseroof verskyn. Hy verskyn weer Vrydag 29 Oktober voor die hof vir ‘n formele borgaansoek en bly in aanhouding tot dan.