Karisa se wen die somtotaal van harde werk

Karisa Nortman, ’n graad 6 leerder van Parys Primêre skool, is vanjaar se Vrystaat wenner van die Cum Laude Media Wiskunde-kompetisie, aangebied deur Netwerk24 in samewerking met Die Burger, Beeld en Volksblad. ’n Maklike vraestel was dit beslis nie met graad 6 en 7 leerders wat in die laerskool-kategorie saam moes kompeteer, en graad 10, 11 en 12 leerders wat vir die hoërskool kategorie kon inskryf. Vir Karisa het die prestasie as ’n groot verrassing gekom, en nie sonder baie harde werk nie.
Die eerste, en ook die finale uitdunvraestel is aanlyn geskryf, maar is deelnemers tydens die vraestel deurentyd op kamera gemonitor. Die drie toppresteerders is as nasionale wenners aangewys, terwyl die top 3 in elke provinsie ook bekendgemaak is. Karisa was in 2020 ook ’n nasionale wenner van die ATKV Digispel kompetisie in die graad 4 & 5 kategorie.