Die SAMA-bekroonde musikant en liedjieskrywer, Ray Dylan, wat oor die jare bekendheid verwerf vir treffers soos Hokaai Stoppie Lorrie, Dis Verby, Jessica, Hier binne klop ’n Boerehart, Angel-face, You’re My Everything, Vir Ewig Jonk, Uitbasuin, Hier Teen Jou Lyf en meer, het lankal reeds die kuns vervolmaak om met Afrikaners se harte te praat. Sy nuutste vrystelling, ‘Laaste Groet’ volg in die voetspore van die voetjeuklekker-popsnit, “By Jou Voete Lê”, wat steeds in die nr.1 posisie op talle radiostasies se trefferparades is. Die musiekvideo, wat deur Wian van der Walt van Vonk vervaardig is, is reeds deur sowat ‘n halfmiljoen mense op YouTube gekyk. Die emosiebelaaide snit, wat hy saam met Piet Farrell geskryf het, gaan daaroor om afskeid te neem van ‘n geliefde.

“Ek en Piet het destyds albei mense baie na aan ons verloor en toe besef dat tyd kosbaar en net vir ons geleen is,” vertel die sanger. “Die lied het my weer eens net laat besef dat ons mekaar moet waardeer en ondersteun in moeilike tye.” Ray beskryf Laaste groet as ‘kos vir die siel’ en glo dat mense by die lirieke sal aanklank vind juis omdat Covid-19 soveel verlies en hartseer veroorsaak het. Hy hoop ook dat die liedjie in ‘n mate vertroosting sal bring.

Ray Dylan is al vir drie-en-dertig-jaar in die musiekbedryf doenig, en was maar twaalf jaar oud toe hy saam met Bles Bridges begin toer en optree het. Oor die jare, het hy verskeie goue- en dubbelplatinumstatus-albums en -liedjies uitgereik wat van hom ‘n huishoudelike naam en groot gunsteling op die dansbaan gemaak het. Tans werk hy aan twee nuwe albums wat hy binnekort wil uitreik en sien uit daarna om weer voor groot gehore op te tree. Laaste groet is op alle digitale platforms beskikbaar.