Kom kry jou oog op die ring
Kom kry jou oog op die ring
Die ringtennis-seisoen vir 2021/22 het weer begin en word daar weer op Dinsdae en Donderdae in die kerksaal van die NG gemeente Parys-Oos vanaf 17:00 geoefen. Hierdie is ‘n sport wat beslis ewe veel pret as uitdaging bied en solank jy nog vlug van voet en oog is, is jy beslis nie té jonk, of té oud vir ringtennis nie.
Die sport word reeds vir ‘n geruime tyd aktief in Parys beoefen, en is daar selfs Parysenaars wat al met groot sukses hul slag by die nasionale kampioenskappe gaan wys het.
Benewens die oefening wat die sport jou bied, is dit die ideale geleentheid om mense te ontmoet met weeklikse sosiale spel, en terselfdertyd ‘n lekker wegbreek na ‘n langs dag se werk.
Naas ‘n paar tekkies het jy niks meer nodig nie. Net die gewilligheid om saam te kom speel. Jy hoef ook nie ‘n ervare speler te wees nie. Beginners en selfs kinders is baie welkom om saam te kom oefen.
