Leerlinge van Erna Rademan se Musiekskool, onder beskerming van Gaudium Artes, het Vrydagaand vir hul ouers en familie konsert gehou by Willow Banks. Dié midjaarkonsert moes weens vlak 4- inperkings met ‘n maand uitgestel word, tot die kinders se groot teleurstelling. Vrydagaand kon hulle egter hul ouers se harte warm maak met hul optrede en het hulle behoorlik geskitter! Die kinders speel ‘n verskeidenheid instrumente waaronder viool, tjello, blokfluit en klavier, wat Erna kombineer om die leerlinge die vreugde van ensemblespel te laat ervaar. “Een konsert is vir die kinders beter as 100 lesse,” sê Erna.
“Elke kind se bydrae word met aanvaarding en waardering deur die ouers ontvang. Dis ontsettend goed vir hul ontwikkeling en selfbeeldvorming.” Die kinders het ‘Môre Juffrou, môre klas’, met Valencia Steenkamp as die Juffrou, terdeë geniet. Klein Ellerike van der Westhuizen met haar krullebol, het almal se harte vermurwe met die uitvoering van ‘Twinkle, twinkle little star’ op haar klein viool. Die program het draaie geloop deur die allermooiste musiek. “Elke item was ‘n hoogtepunt,” sê Erna. Die kinders het reeds begin voorberei vir die Kersfeeskonsert, wat gedeeltelik aan musiek uit ‘The Sound of Music’ gewy gaan word.