Die aantal nuwe positiewe Covid-19 gevalle vir Parys is die afgelope vier weke stabiel met geen toe- of afname in gevalle nie. Parys het die week tot en met 8 Augustus op 79 positiewe gevalle afgesluit, teen 83 die vorige week. Die res van die dorpe in die Ngwathe-munisipaliteit het in albei weke 64 gevalle aangemeld, ongeveer 30 gevalle per week minder as die vorige twee weke. Die afname in gevalle is hoofsaaklik in Heilbron en Koppies, terwyl Verdefort se gevalle net soos Parys redelik stabiel is. Die sewedaagse rollende gemiddeld vir Parys staan tans op 12 positiewe gevalle per dag. Dit is die gevolgtrekking wat Karin Grobler kon maak uit statistieke van die aantal nuwe gevalle wat deur die departement van gesondheid beskikbaar gestel is. Karin het haar meestersgraad in bedryfswiskunde en informatika en het die onderstaande grafieke saamgestel wat ’n duidelike prentjie gee van wat in Parys en die ander Ngwathe dorpe gesien word.