Wanneer dit winter is, is jy mos ekstra honger. Veral saans wanneer dit koud en donker is. Ons hoef nie Hillbrow toe te gaan om hongerte en ellende te sien nie. In Parys, soos in baie ander dorpe, is daar soveel mense wat regtig swaarkry. Hoe bitter moet dit nie wees om ‘n kind honger bed toe te stuur, of sonder ontbyt? Dit is waarom Vrystaat Versorging in Aksie ‘n paar jaar gelede die Broodjiedag-projek begin het.
Teen vroeg vanoggend is daar reeds 42 brode afgelaai by VVA se kantoor in Buitenstraat vir vanjaar se Broodjiedag, en het Blikoortjies se kleuters ook fluks bygedra met 33 brode. Ook PCS het hul bydrae gegee vir Broodjiedag. VVA se Broodjiedag is vandag en môre 30 Julie.
Jy kan dus môre ook nog jou broodjie-bydrae gee.
Dalk het jy net een ekstra brood, broodrolletjies of ‘n paar toebroodjies wat jy kan gee vir iemand in nood vir wie dit werklik ‘n verskil maak.
Jy kan jou bydrae afgee by die VVA-kantoor in Buitenstraat, Parys, of skakel die VVA-kantoor by (056) 811 2971 om te reël dat die brood by jou afgehaal word. Nie een enkele brood sal verlore gaan nie, maar word versprei na hulle wat nood het. Of dit een brood of tien brode is – elke bydrae maak ‘n verskil Die projek kan net slaag met die gemeenskap se ondersteuning. Kom ons help hulle wat minder het as ons.
