Die plaaslike DBV-tak het weer Maandag in die vroeë oggendure deurgeloop toe panele van die beton omheining omgestamp en gebreek is, en die lemmetjiesdraad bo-op die beton geknip is. Die lemmetjiesdraad is net die vorige week reggemaak. Hoewel niks gesteel is nie, kos dié skade die DBV geld wat daar nie is om voortdurend te vervang en reg te maak nie.
In April vanjaar is daar ook by die DBV ingebreek en was daar byna nie ‘n ding wat nie gebreek, beskadig of weggedra is nie. Die inbrekers het toe van die munisipale perseel aangrensend tot die DBV-perseel gekom, ‘n gat in die draad gesny, en oor die muur geklim.
Ruite is gebreek en diefwering gebuig. Selfs van die diere se medisyne, skoonmaakmiddels, blikkies hondekos en gereedskap is toe gesteel. Die inbrekers is nooit gevang nie. Die DBV kry geen befondsing nie. Hulle is totaal afhanklik van individue en sakelui vir skenkings om die diere in hul sorg te kan versorg, en finansiële verpligtinge vir bedryfsuitgawes na te kom.
Skenkings is altyd welkom om die organisasie te help, maar jy kan ook die SPCA Charity Shop oorkant PnP in Philipstraat ondersteun en só ’n bydrae lewer vir die DBV, of jou tyd en hande gee om te help waar jy kan. Die skade aan die omheining moet herstel word – dalk kan jy help, of op enige ander manier hulp aanbied om ‘n verskil te maak.
