Volgens die jongste syfers van die Sentrale Energiefonds (SE) kan die brandstofprys met meer styg as wat aanvanklik verwag is.

Dit toon  dat die petrolprys (vir 93- en 95-oktaan) moontlik met onderskeidelik 42c en 38c per liter styg. Die prysstyging in diesel is selfs meer met 53c en 54c (afhangend van die swawelinhoud) per liter. Paraffien se prys kan met 55c per liter styg.

Dié syfers word volgens Netwerk24 bepaal deur die beweging van die internasionale ruolie pryse en die rand-dollar-wisselkoers. Hoewel die rand sedert Desember heelwat versterk het teenoor die dollar het dit weer intussen gedaal van R15 tot R14,59 vir ʼn dollar. Die ruolieprys het egter sedert die begin van Desember begin styg. Die prys van Brent-ruolie het van $47 per vat tot $50,61 per vat gestyg.