‘n Gedeelte van die dak voor die Palm Gate-sentrum in Philipstraat, Parys het Sondagaand 13 Desember net voor 19:00 ineen gestort terwyl ‘n swaar reënstorm in die dorp gewoed het.
Toegang na die Kitchen Gossip winkel asook die winkel reg langsaan is deur die bourommel versper en het mense Maandagoggend vroeg al op die sypaadjie saamgedrom om te kyk na die skade.
Volgens Matthes Phantsi, bestuurder van Eagle Eye Security wat 24 uur patrollies by die sentrum doen, wou twee van die maatskappy se sekuriteitspersoneel, William en Pule, net die straat kruis om weer voor die sentrum te patrolleer, toe die dakgedeelte voor hul oë ineen stort.
Wonderbaarlik is niemand in die voorval beseer nie. Bedags is daar heelwat voetgangers wat op die sypaadjie voor die sentrum verby beweeg en is daar groot dankbaarheid dat die voorval nie gedurende die dag gebeur het nie.
Swaar reën, wind en selfs hael en sedert verlede Donderdag in Parys geval het, en is skade ook aan verskeie bome aangerig, onder meer langs Breëstraat en in Fouchestraat, terwyl talle inwoners ook weerligskade aan elektriese toestelle gehad het.
