Die Parys Kersmark begin hierdie naweek (Saterdag 12 Desember) en vanjaar kan besoekers weer uitsien na uitsonderlike handgemaakte produkte – ideaal vir daardie iets anders vir iemand spesiaal hierdie Kersfees. Vanjaar kan jy onder meer by hierdie nou reeds bekende mark, ook klere vir die voller figuur, skoene, vlekvrye staal eetgerei, herwinbare aluminium dekor, boeke, pottebakkerswerk, sandsteen produkte, fotorame, Martie Swanepoel se unieke lappe soos gesien op Kwêla, kunsprodukste soos stensils, leerprodukte, swepe en blaasbalke, miniatuur “tuine” en vetplante, verskeie laserprodukte, pophuise en popklere om maar net ’n paar items te noem, te wagte wees.

Die mark duur tot 23 Desember en kan van 12-23 Desember van 09:00 tot 18:00 daagliks op die boomryke kerkterrein van die NG-gemeente Parys-Wes, h/v Grens- en Kortstraat besoek word. Toegang is gratis en ‘n teetuin sal sorg dat die innerlike versterk word terwyl jy Kerskopies doen. Maak ’n draai. Kom sommer ’n paar keer, want jy is gewaarborg om elke keer iets te sien wat jou oog sal vang.