Net meer as ‘n week na die ernstige motorongeluk waarin Marné Prinsloo betrokke was op die h/v Kort- en Uniestraat in Parys, is daar beterskap. Marné is van die ventilator afgehaal en die voedingsbuis is ook vandag uitgehaal. Haar oë is oop en sy kon begin eet. Sy het haar mense herken en reageer op hul vrae, hoewel sy nog baie swak is.

Marné het baie ernstige kopbeserings in die ongeluk opgedoen en het bloeding op die brein. Twee van haar rugwerwels is ook gebreek.

Sy is steeds in die Netcare Milpark-hospitaal in Johannesburg. Marné was ‘n oudskolier van Hoërskool Parys en het vanjaar in Potchefstroom haarkappery begin studeer.

Die gesin sê baie dankie vir almal wat sedert die ongeluk getrou vir Marné gebid het en hulle ondersteun het op soveel maniere.