Die aksie wat verlede week in Parys se sakekern gesien is toe ’n helikopter vir die eerste keer ooit in die dorp se sakekern op die parkeerterrein van die Palm Court inkopiesentrum geland het, het beslis die koppe laat draai.
Die helikopterlanding het deel gevorm van ‘n grootskaalse misdaadvoorkomingsaksie wat deur CSS Sekuriteit, in samewerking met die polisie, verkeer, nooddienste, brandweer, IMR ambulansdienste, We Care en die sakeman mnr. Peter Papavarnavas, geloods is.
Dit was dan ook CSS se eie helikopter wat as deel van die bewusmakingsaksie, op die parkeerterrein geland het. Vyf en dertig CSS voertuie was ook deel van die aksie.
Die projek is naas Parys, ook in Klerksdorp, Stilfontein, Potchefstroom, Kroonstad, Orkney, Meiringspark en Bothaville geloods, en is daar veral gefokus op die samewerking tussen die onderskeie dienste, nie net in noodgevalle nie, maar ook in die voorkoming van misdaad.
As jy gewonder het oor hoe die beplanning van so ’n helikopterlanding werk – daar is twee weke lank intens met al die rolspelers saamgewerk om dit moontlik te maak. Eers moes ’n geskikte plek geïdentifiseer word, die terrein moes geïnspekteer word, toestemming van die grondeienaar verkry word met die koördinate wat dan vir goedkeuring na die SA Civil Aviation Authority gestuur is. “Daar moes seker gemaak word dat daar geen obstruksies sou wees met die land en opstyg van die helikopter nie, veral wat betref oorhoofse drade en bome.” “En dan moes daar ook vooraf foto’s van die terrein verkry word om seker te maak dat ’n landing veilig uitgevoer kan word,” sê Gary Chatwind, een van CSS Sekuriteit se direkteure.
