Ons meer ‘oop’ ekonomie sedert eergister is ‘n wenner vir Parys, want huis-tam stedelinge gaan naweke seker weer in groot getalle hier kom kuier, veral soos wat die lente vorder. Besoekers verkies ‘n sindelike dorp, met skoon strate en piekniekplekke. Gelukkig hou die meeste sakelui in Breëstraat lank reeds die sypaadjies en watervore voor hul winkels skoon. Maar die dorpskern, soos Middel-, Kort- en Philipstraat, was onlangs oor naweke besaai met afval.

Dit is waarom ek en mede-raadslede verlede week ‘n skoonmaakaksie vir die dorpskern en besienswaardighede geloods het (Gazette, 13 Augustus). Die aksie kry reeds baie steun. Van die ondernemings in die sentrale deel het belowe hulle gaan ook nou oor naweke hul omgewing help skoonhou, en die Ngwathe munisipaliteit asook verskeie burgerlike organisasies het onderneem om hand by te sit. ‘n Skoon Parys lok besoekers en natuurlik ook beleggers.