Koketso Diloane, kommunikasiewoordvoerder van Witrand, het vroeër die week aangekondig dat 103 pasiënte nou virusvry is. Daar is op die oomblik 10 pasiënte wat simptome van Covid-19 toon, maar niemand het tans nodig om in die waakeenheid opgeneem te word nie.

Sover het vyf pasiënte en een personeellid aan die virus gesterf.

ʼn Administrateur van Noordwes Gesondheid, Jeanette Hunter, het verlede Sondag, 19 Julie Witrand besoek om die infrastruktuur en diensleweringsprogramme van die hospitaal te evalueer. Die besoek was deel van ʼn uitgebreide toer na verskeie hospitale in die noordwes – onder meer Ventersdorp, Potchefstroom Hospitaal, Klerksdorp en Tshepong Hospitaal.

By Witrand word saal 2 blok C, G en E tans as isolasie-eenhede gebruik vir binnepasiënte wat positief vir Covid-19 toets.

Diloane herinner buitepasiënte wat afsprake geskeduleer het om by hulle afsprake te hou. Diegene wat nie hul afsprake kan bybring nie, weens onvoorsiene gebeure of Covid-19, word gevra om alternatiewe reëlings met die hospitaal te tref sodat daar ʼn kontinuïteit in die inname van hul voorgeskrewe medikasie is.

Die hospitaal doen ook ʼn beroep op alle buitepasiënte wat die hospitaal besoek om aan die institusionele Covid-19 regulasies te voldoen wat die dra van ʼn masker, verpligte siftingsproses, sanitasie en die toepaslike sosiale distansiëring insluit.