Daar’s hoop!
Dit was vandag, Saterdag 4 Julie die woorde van verskeie sakelui in Parys nadat die dorp se hoofstraat vir die eerste keer sedert die nasionale staat van inperking weer voete en beweging gehad het by die talle winkels en restaurante in die dorp. Broodnodige besoekersvoete wat die hartklop is van die Vrystaatse dorpie was totaal afhanklik is van toerisme vir sy voortbestaan.
Sedert einde Maart vanjaar was die stil strate en herfsblare wat in hopies op die winkelstoepe gelê het voor toegesluite winkeldeure, ‘n hartseer herinnering van wat eens die gesig naweek vir naweek in die dorp was toe dit gewemel het van mense wat in die strate rondgedrentel het om die dorp se gasvryheid te beleef.
Hoewel dit vir baie besighede nog lank sal neem om te herstel, en ander nie die terugslag oorleef het nie, was wat vanoggend gesien is, net weer ‘n asemskep van hoop.
Parys sê dankie aan elke besoeker en elke inwoner wat ten spyte van uitdagende tye weer die dorp laat lewe het!
