Dit gaan baie beter met die 4-jarige Leonel Riekert van Parys en sy speel en lag weer. ‘n Skêr het op Dinsdag, 2 Junie haar linkerwang gepenetreer en ernstige skade aan haar linkeroog aangerig, toe sy met die skêr in haar handjies geval het.

Leonel het steeds nie sig in haar oog nie, maar sy en haar ouers, André en Mari wag in spanning om te hoor wat dr. Bernard Wolff, ’n vitreo-retinale spesialis, sal sê wanneer sy hom môre, Vrydag 19 Junie, moet sien om te hoor wat die pad vorentoe vir haar is.

Twee operasies is reeds op haar linkeroog gedoen – om die wond te heg, en ook verlede week om die skade aan haar retina te probeer herstel.
Hoewel daar nog ’n lang pad na herstel vir Leonel voorlê, is die gesin oneindig dankbaar vir elke gebed en elke bydrae wat gemaak is tot die trustfonds wat vir Leonel gestig is om haar mediese kostes te betaal.

Die gesin het nie ’n mediese fonds nie en die staat kan tans nie sulke delikate operasies doen nie.