Nadat daar verlede week behoorlik rondgespring is om alles in plek te kry vir graad 7 en graad 12 leerlinge wat Maandag sou terug gaan skool toe, is dit op die nippertjie Sondag uitgestel na 8 Junie.
Minister Angie Motshekga, minister van basiese onderwys, het Maandag gesê daar was geen ander keuse nie met provinsies wat nie op dieselfde gereedheidsvlak was nie. Gautengse en Wes-Kaapse skole was die beste voorberei met skole in die Vrystaat, Noordwes en Oos-Kaap wat op medium vlak van voorbereiding was.
Sowat 2634 skole het toe nog nie watertenks of voldoende watertoevoer gehad nie, is Maandag gesê. Daar was ook nog skole wat nie gesigmaskers en ontsmettingsmiddels ontvang het nie.
Die minister het gesê sy is hoopvol dat alle uitstaande kwessies die week afgehandel sal word sodat skole minstens Maandag sal kan open vir die matrieks en graad 7’s waarvoor daar by baie skole verlede week omvattende voorbereiding gedoen is om seker te maak alles moontlik word gedoen vir personeel en leerders se veiligheid.