Vaalweekblad het die afgelope week tientalle navrae van bekommerde lesers ontvang nadat foto’s van krake in die brug langs Stonehaven in Vanderbijlpark, op verskeie Facebook-blaaie versprei is. Die foto’s toon opsigtelike krake – maar is daar regtig ‘n dreigende gevaar?

Vaalweekblad het die eienaars van Stonehaven oor die toestand van die brug gekontak om te verneem of hulle reeds ondersoek daarna laat instel het.
Volgens mev. Rosemary Anderson het sy en haar man, Rex, reeds in Februarie verlede jaar (2019) besluit om die Gautengse Paaie-departement oor die krake in te lig. Die Paaie-departement het vinnig gereageer en ‘n deeglike ondersoek is etlike dae later deur ‘n strukturele ingenieur, wat spesiaal van Pietermaritzburg af ingevlieg is, gedoen.

Die bevinding was dat die brug veilig en stewig is en dat die krake geen invloed op die standvastigheid van die brug het nie. Daar is wel bevind dat die brug algemene instandhouding benodig, waarvoor die Gautengse Provinsiale Regering glo in die nuwe boekjaar begroot het.

Vaalweekblad is in die proses om ‘n verslag oor die ondersoek en bevindings aan te vra en sal mettertyd deeglik daaroor verslag doen.

Foto’s van die krake in die brug langs Stonehaven, wat die afgelope week deur bekommerde lesers op Facebook gedeel is.