SASOLBURG. – Die voorheen pragtige Vrystaatse dorp wat vir soveel jare (nou lank gelede) gereeld pryse gewen het vir die toestand van die dorp, is nou vir baie inwoners ‘n verleentheid.

Dit is veral die toestand van die groenstroke wat inwoners nou laat rooi sien. Die groenstroke is destyds spesifiek geskep om die areas mooi en ruim te laat lyk. Nou is dit verwaarloos en eintlik gevaarlik om dit behoorlik te benut.

“Kyk hoe lyk dit, wat ‘n gemors en die plaaslike munisipaliteit doen eenvoudig niks daaromtrent nie,” kla mnr. Dereck Combrinck, een van vele inwoners wat graag verbetering wil sien.

Hy het die foto’s van die groenstrook, aangrensend van Van Graan, Fourie en De la Rey geneem en na Vaalweekblad gestuur.