Die Koedoesfontein-geloftefeessaal net buite Parys, het vanoggend uit sy nate gebars met Geloftefeesgangers wat vanoggend se diens bygewoon het.
Die diens is gelei deur ds. Juan de Beer van die Hervormde Kerk in Parys.
In sy treffende boodskap het ds. De Beer gesê dat Geloftedag gaan oor God se teenwoordigheid. “God het nog altyd opgedaag. Op die regte tyd.”
Hy het gesê dat daar geen twyfel is dat mense Geloftedag onthou nie, maar die vraag gevra of mense nog die waarde van die dag besef. Met die treffende beeld van ‘n bewegende swaai het hy gesê dat ons Geloftedag onthou vir die dag vir wat dit is, maar dat dit meer as net ‘n herinneringsdag is.
Die diens by Koedoesfontein was een van verskeie dienste wat vandag in en om Parys gehou is by onder meer die Moedergemeente, APK en Dewetsdrift Geloftefeesterrein.
