VEREENIGING. – ’n Basterbrakkie wat in Augustus deur ’n kar raakgery is en vir dood langs die pad agtergelaat is, het bykans ten volle herstel en lewe nou soos ’n prinses by haar nuwe tuiste by Baxter’s Bark & Breakfast, ’n luukse hotel vir honde op ’n kleinhoewe tussen Vereeniging en Meyerton. Deoné Longstaff, eienaar van Baxter’s Bark and Breakfast, en haar man David, het vir “Annie” (volle naam “Annie the Orphan) onder hul vlerk geneem nadat hulle gehoor het wat met haar gebeur het.
Longstaff vertel dat Yvette Wilde, ’n bekende plaaslike diereaktivis wat die 50 Shades of Spay-projek bedryf om diere te steriliseer en veeartsenydienste aan behoeftiges met troeteldiere verskaf, die hond van ’n gewisse dood gered het. Longstaff vertel: “Hulle het haar net daar langs die pad gelos. Altwee haar bene was gebreek en sy het harsingskudding opgedoen. Haar lewe het aan ’n draadjie gehang.”
Nadat Longstaff van die hond te hore gekom het, het sy en haar man besluit om dié brakkie in te neem. Annie is vir haar beserings behandel en daarna ingeënt, ontwurm en natuurlik gesteriliseer. Intussen het sy merkwaardig herstel van die ongeluk. Longstaff vertel: “Sy bly nou in kothuisie (of is dit nou hotelkamer) nommer 2 by Baxter’s Bark & Breakfast en kom oor die weg met almal. “Sy is soos ons conceirge (inwoner/opsigter) hier by die hotel,” sluit Deoné af.
