Bitterkoue, nat weer en uitdagende hindernisse het Willem Janse van Vuuren en Alida van Dyk nie in die minste afgeskrik vir die wêreldkragmeting van die Obstacle Course Race met sy 76 hindernisse waaroor geklim en geklouer en selfs deur modder geploeg moes word nie. Die wêreldkragmeting is van 11 tot 13 Oktober in Londen beslis. Albei Parysenaars het by die Suid-Afrikaanse kampioenskappe van die gewilde Warrior Race, gekwalifiseer vir die Wêreldspele waaraan 3 000 atlete vanjaar deelgeneem het.

Met die uitdagende weersomstandighede kon net sowat 500 atlete die baan voltooi. Alida het ‘n skitterende 13de plek vir die 3km in haar ouderdomsgroep behaal, terwyl Willem algeheel 59ste in sy ouderdomsgroep was. Deelnemers het die kragmeting as van die strafstes beskryf. Willem en Alida sê dankie aan hul vriende en familie en Namgola wat hul deelname moontlik gemaak het, en die Crossperity-span vir al die ondersteuning.