Hoekom nie die daad by die woord voeg en ‘n verskil maak nie?
Dit is die uitgangspunt van die plaaslike Rotariërklub president, Louis Janse van Rensburg, wat verlede Dinsdag met die hulp van Ferdie van der Westhuizen, self die moue opgerol en begin het om slaggate in die omgewing van die hangbrug reg te maak.
Louis Janse van Rensburg en Ferdie van der Westhuien waar hulle verlede week slaggate in die omgewing van die hangbrug reggemaak het. Foto: Verskaf.
Louis sê niks skrik toeriste so af as strate wat vol gate is nie. Omdat die hangbrug so ‘n gewilde toeriste besoekpunt is, is besluit om vanaf die hangbrug al langs die rivieroewer tot by Paulsenstraat die slaggate te herstel, waar die pad op plekke al meer na ‘n slagveld as ‘n teerstraat lyk.
Verbygangers was so beïndruk met hul werk dat daar selfs mense was wat aangebied het om teer te koop sodat slaggate in die strate waar hulle woon, ook herstel kan word.
Louis sê dat die oogmerk van die Rotariër-projek is om uiteindelik ook die slaggate in al die dwarsstrate wat vanaf Boomstraat na die rivier loop, te kan herstel, juis ter wille van toerisme.
Maar om dit te kan doen is fondse nodig. Louis meen dat minstens 100 sakkies teer nog nodig is om net langs die rivieroewer tot by Paulsenstraat te vorder. Teen R55 ‘n sakkie teer beteken dit R5 500 om die gate op dié roete te herstel. Elke sakkie teer maak ‘n verskil, sê Louis.
Mense wat graag ‘n bydrae tot die Rotariër-projek wil maak vir die teer en arbeid wat nodig is, kan Louis WhatsApp of skakel by 082 372 6988 vir meer inligting.
Mense kan hom ook kontak waar hulp nodig is met slaggate in ander strate sodat die Rotariërs waar moontlik, kan help met arbeid, as mense net self die teer voorsien.
