Man alleen. Oor vyf provinsies en deur 50 dorpe. So by die 2 700km van die Voortrekkermonument tot by die Taalmonument, en dit vir die Voortrekkerbeweging.
Die 77-jarige Jakkie van der Colff glo nie verniet dat as jy iets wil doen, en dit is bereikbaar, jy dit KAN doen nie – ongeag wie en wat jy is. En sy hartsbegeerte – dat elke kind die voorreg sal kan hê om ‘n Voortrekker te wees. Hy wil by elke Voortrekkerkommando aandoen op sy roete en waar hy gaan die beweging bekendstel.
Hy gaan ook op sy pad geld insamel deur borge wat hom per kilometer borg sodat hulle wat dit nie kan bekostig om ‘n Voortrekker te wees nie, kan aansluit, en die Voortrekkers ook meer gemeenskapsprojekte kan aanpak.
So het oom Jakkie Sondag by die Voortrekkermonument weggespring waar hy afgesien is deur Voortrekkerkommando-lede.
Maandagmiddag was hy veilig in Potchefstroom waar hy deur die Totius-kommando verwelkom is, en Dinsdagoggend het hy die pad gevat Parys toe, vergesel deur Don Jordaan, offisier van Parys Kommando.
In Parys het die Voortrekkers reggestaan vir ‘n toer vir oom Jakkie na die hangbrug, die Museum, die ou huis in Oranjestraat en die jeugsentrum by Udolpho.
Woensdagoggend het die hele Parys Kommando oom Jakkie op die laerskool se teerblad afgesien vir sy volgende skof na Kroonstad. Oom Jakkie is ‘n afgetrede predikant en kranige fietsryer sedert 2013.
Hy sal op 21 September by die Taalmonument in die Paarl arriveer, nadat sy fietswiele hom deur die Hartbeespoortdam/Brits-omgewing, Carletonville, Potchefstroom, Parys, Kroonstad, Welkom, Bloemfontein, Edenburg, Trompsburg, Springfontein, Colesberg, Graaff-Reinet, Somerset-Oos, Paterson,Uitenhage, Despatch, Port Elizabeth, Humansdorp, Plettenbergbaai, Knysna, George, Witsand, Swellendam, Bredasdorp, Hermanus, Caledon en Worcester geneem het.
Soos met sy vorige fietstoere, gaan hy hierdie fietstoer man alleen aanpak, sonder begeleiding of ‘n ondersteuningsvoertuig wat hom vergesel. Jy kan help fondse insamel vir die Voortrekkers met dié toer deur oom Jakkie per kilometer te borg. Gelde kan in die Parys-kommando se rekening inbetaal word. Die rekeningbesonderhede is: Parys Voortrekkerkommando, ABSA, tjekrekeningnommer 113 094 0028. Gebruik “Oom Jakkie” as verwysing.
Volg ook gerus die Rol-die-wiele fietstoer op Facebook om te sien waar oom Jakkie hom tydens die toer bevind. Kyk ook na die hutsmerke #roldiewielefietstoer #DieVoortrekkers
