Pieter de Klerk en Marlene Smit het Vrydagaand 26 Julie dapper terugbaklei toe hulle op die plaas Vanderwaltsrus tussen Schoemansdrift en Skandinawië, deur 5 gewapende mans oorval is.
Pieter (62) en Marlene (60), het net in die motorhuis ingetrek nadat hulle hul werkers afgelaai het, toe die mans op hul afgestorm het.
In die warboel van chaos wat in die volgende minute sou volg, is skote op hulle geskiet en is Marlene in die arm gewond. Hulle het kop gehou en sonder ophou terugbaklei en het Marlene ook haar rewolwer uit haar handsak kon uithaal en n skoot afgevuur. Die wapen, haar handsak, kontant en haar selfoon is egter deur hul aanvallers afgevat.
Pieter kon daarin slaag om die paar treë van die motorhuis na die huis te vlug om sy vuurwapen te kry. Die aanvallers is egter agterna en het nog struweling in die kombuis gevolg waarop Pieter skrams in die agterkop deur sy aanvallers geskiet is.
Die vyf mans het egter te voet gevlug toe Pieter daarin geslaag het om sy vuurwapen te kry.
Die mans was vanoggend nog op vrye voet en is n grootskaalse soektog nog aan die gang gelei deur Vredefort Koepel Gemeenskap Polisiëring Forum lede, SAPD lede van Vredefort en Viljoenskroon, asook lede van Juliet Brand- en Veiligheid sektor.
Pieter en Marlene is tans in Potchefstroom Medi Clinic waar hul aansterk en Marlene waarskynlik later vandag teater toe sal gaan om skrapnel uit haar arm te verwyder en senuwees te heg.
Ten spyte van hul nagmerrie ervaring gaan dit goed met Pieter en Marlene en sê hul baie dankie aan hul bure en almal wat hulle te hulp gesnel het.
