Parys SAPD en Gemeenskap Polisiëring Forum (GPF) lede het die afgelope naweek saam met die Tumahole fietsryklub, ‘n grootskaalse bewusmakingsveldtog teen die gebruik van dwelms en alkoholmisbruik geloods.
Vier en sestig fietsryers het aan die Sport Against Crime-veldtog deelgeneem, toe daar van Sasolburg na Parys fiets getrap is.
Pamflette is versprei, terwyl Gary Westwoord en sy span van Epilepsie SA se Vrystaat/Noordwes-sentrum reggestaan het met heerlike warm sop.
Dit is beslis verwelkom met die snerpende koue wind wat jou Saterdag na jou jas en handskoene laat gryp het.

Die fietsryers is ook toegespreek deur mnr. Masilo van Departement Polisie, Paaie en Vervoer.
Dankie aan al die borge wat gehelp het om hierdie dag moontlik te kon maak.

* Ao. Jan le Roux van die Parys SAPD en Anne-marie du Toit, voorsitter van Parys GPF, het ook verlede week Madiba-dag gebruik om ‘n besoek te bring aan Najaarsrus se bejaardes om onder meer te praat oor veiligheid by banke en bankkaartbedrog.
Daarna is die bejaardes met heerlike koffie en muffins bederf.