Liezl Scheepers
Is hulle ook bekommerd oor die toestand van ons land? Watter wysheid deel hierdie gevalle helde dalk met jou? As hierdie vrou ʼn tweede kans kry, wat sou sy verander?
Dalk haal jy gewoonlik net ‘n noot uit jou beursie…of dalk stap jy verby?
Maar het jy al geluister…regtig gehoor? Het jy al jou glimlag gedeel?
Wie is hulle wat van die strate af leef? Waar kom hul vandaan? Het hul families, kinders? Droom hulle soos ek en jy? Wat inspireer hulle?
Wil jy nie kom saamkuier Donderdag 18 Julie vanaf 17:00 op die oop terrein reg voor die Parys-museum? Daar waar die vuur gesellig warm deurnag sal knetter so op Madiba-dag.
Jy’s ook genooi na die saamkuier waar sakelui van die dorp en die Imbumbu-jeugontwikkeling in samewerking met die Parys-museum, en mense soos ek en jy sal uitreik om iets van onsself te gee. Tyd.
Tyd om na ander te luister. Tyd om te deel. Tyd om uit te reik na hulle wat minder het om te gee.
Bring sop, warm sjokolade of malvalekkers. Deel jou gunsteling bederf met iemand en hoor sy storie. So kan ons stories versamel, oorvertel en hoop bring. Hoop gebore uit begrip.
Vir meer inligting kontak Diané by 071 388 0446. As jy net ‘n skenking wil maak – enigiets warm, gee dit af by Boomstraat 32, by die Parys-museum (Vrydag of Saterdag tussen 09:00 en 13:00) of by die Gazette se kantoor in Waterstraat. Of nog beter – bring dit en kom kuier saam by die Mandela Day Fire 4 Hope op Donderdagaand 18 Julie. Dankie aan Mbulelo Mtshilibe wat met hierdie mooi gedagte na vore gekom het.
