Volgens AO Peter Masooa was die 55-jarige man omstreeks 05:30 besig om sy 17-jarige dogter skool toe te neem toe die rowers hulle op ‘n plaas buite Fochville oorval en in die huis teruggedwing het.
Die boer is met ‘n voorwerp oor die kop geslaan en sy dogter is verkrag.
“Dit is nie seker of die mans gewapen was nie,” sê Masooa.
Die rowers het in die boer se silwergrys Ford Ranger gevlug. Die voertuig is later by die Senzele plakkerkamp teruggevind.
Die boer en sy dogter is na die voorval deur mede-inwoners te hulp gesnel en hospitaal toe geneem.
Die saak word deur die polisie in die Wesrand se Trio-taakspan ondersoek.
Enige iemand met inligting kan die Westonaria polisiestasie by 011 2785321 of 10111 skakel.
