Eskom se dreigement van ekstra “bestraffende beurtkrag” (Gazette 4 Junie) of erger nog, die totale afsny van krag, het verlede week effe vervaag.
Die kragreus se eie senior kenners kom nou elke Woensdag na Parys om munisipale amptenare te help om ’n finansiële herstelplan te ontwikkel. Intussen sal Eskom geen verdere regstappe teen Ngwathe neem, of bestraffende beurtkag instel nie. Só is die burgemeester se spesiale taakspan oor Eskomskuld verlede week ingelig. Gazette het vroeër berig oor burgemeester Joey Mochela se nuwe taakspan wat ’n haalbare skuldafbetaalplan aan Eskom probeer formuleer.
Die taakspan het aanvanklik net uit senior ANC-raadslede bestaan, maar is drie weke gelede vergroot om DA-raadslid Arnold Schoonwinkel in te sluit. Hy is DA-koukusleier en segsman in Ngwathe oor munisipale finansies. “Eskom het blykbaar reeds voorverlede week hiertoe ingestem, maar Ngwathe het geswyg, selfs na ‘n ontstellende koerantberig dat Ngwathe ‘min dae met krag’ oor het,” sê DA-koukusvoorsitter Carina Serfontein. Sy kla raadslede of sakelui is nie onmiddellik ingelig oor Eskom se toegewing nie. Schoonwinkel het Eskom se aanbod verwelkom. “Die DA vra lank reeds dat Eskom Ngwathe met ’n finansiële omkeerstrategie kom help.
Eskom het tot dusver geweier.” Hy sê Eskom het bloot aanhou aandring op terugbetaalplanne van sy agterstallige skuld. Hy sê die DA vra jare al dat ’n omkeerstrategie moet insluit die vasvat van kragdiewe, die regstel van die huidige chaos met foutiewe rekeninge, die herstel van stukkende en foutiewe meters, en die insameling van enorme agterstallige skuld. Ngwathe se nuwe goedgekeurde begroting voorsien vir matige stygings in tariewe. Inwoners sal voortaan 5.8% meer betaal vir dienste soos water en riool, en minstens 12.2% vir elektrisiteit. Eskom het egter verlede week by NERSA (die Energiereguleerder) gepleit om sy eie tarief met 25.3% te verhoog.
ydens die openbare verhoor daaroor is dit teengestaan deur onder meer SALGA (die vereniging van plaaslike owerhede). SALGA het verklaar die voorgenome verhoging is vyf keer die inflasiekoers, en “is onbekostigbaar en onvolhoubaar.” Ook die nasionale Tesourie het Eskom se aansoek teengestaan.
Nuwe tariefskale vir Ngwathe het reeds vandeesweek op 1 Julie in werking getree.
