Dertien mense is gisteraand (17 Maart) op die N12 tussen Fochville en Westonaria oorlede.

Dit volg na ‘n botsing tussen ‘n bakkie en ‘n ander voertuig.

Volgens Russel Meiring, woordvoerder van ER24, het paramedici omstreeks 20:00 op die toneel gekom.

Vyf mense van die een voertuig en agt van die bakkie, onder andere jong kinders, is op die toneel dood verklaar.

Nege ander  is beseer, waarvan ses, in ‘n kritieke toestand hospitaal toe geneem is.

“Drie van die kritieke pasiënte is per helikopter hospitaal toe geneem. Die presiese oorsaak van die ongeluk is nog onbekend maar plaaslike owerhede was op die toneel om verdere ondersoek in te stel,” het Meiring gesê.