Vandag is dit tien jaar later – en steeds geniet menige gholfspeler hierdie juweel van ‘n baan net buite Parys, wat voorheen bekend gestaan het as Die Eiland.
Vaal de Gráce skryf sy eie, baie interessante storie. Daar is vele mooi herinneringe aan uitsonderlike toernooie, kompetisies en liefdadigheids-gholfdae. Laagtepunte was daar ook – soos die dag toe al die gholfkarretjies as gevolg van ‘n elektriese kortsluiting uitgebrand het.
Tog bly elke dag op Vaal de Gráce ‘n hoogtepunt. Die baan het met tyd ontwikkel tot ’n pragstuk. Min dinge oortref die rustige natuurskoon, ryk voëllewe, weldadige klimaat en die ewige gedruis van die Vaalrivier in jou ore, terwyl jy jou rondte voltooi.
Om die 10-jarige bestaan behoorlik te vier, is ‘n spesiale Fees-gholfdag en Casino-aand op 1 Desember by Vaal de Gráce gehou, met waatlemoene wat op die koop toe met ’n gelukkige trekking gewen kon word.
Met die Fees-gholfdag en Casino-aand het die bestuur hul dank betuig aan getroue ondersteuners, vriende en kliënte.
Anje Rademan (regs) het die langste dryf op 9 gehad
Die wenners van die fees-gholfdag – Jacques Botes en sy span van Parys Golf & Country Estate.
