Elna Venter, ‘n Potchefstroomse kunstenaar, se agtste solo-uitstalling het Donderdag by die Blou Galery (Van Rooystraat 31) geopen.
Dit kan beskou word as ‘n buitengewone eksperimentering van verskillende mediums wat tematies by mekaar inskakel.
In hierdie uitstalling, getiteld 8, het Elna met drie uiteenlopende mediums geëksperimenteer. Die konsep van elke kunswerk begin met ‘n collage van foto’s en illustrasies wat sy uitknip en saamvoeg totdat dit volgens skaal en ontwerp by mekaar inpas om ‘n kunswerk te vorm. In elke collage het sy by haar intuïtiewe/onbewustelike keuse van vorms en kleur begin wat sy weer in die volgende stap baie bewustelik in interessante surrealistiese komposisies verwerk het. Elke oorspronklike collage is dan weer skandeer om ‘n digitale drukwerk te skep.
In die laaste stap het sy teruggegaan na haar oorspronklike collage en simboliese elemente daaruit geneem om ‘n oorspronklike olieverfskildery te skep. Die resultaat is ‘n intuïtiewe ontploffing van kleur en ontwerp met ‘n definitiewe ondertoon van die surriële onderbewuste.
Die uitstalling open Donderdag met ‘n rondleiding deur die kunstenaar. Dié rondleiding word Vrydag, 31 Augustus om 18:00 weer herhaal. Die uitstalling duur tot 13:00 op Saterdag 1 September. Vir navrae, skakel Jean Lampen by 082 775 8452.