Skade van meer as R500 000, en dit vir ’n paar rand se koper. Misdadigers wat in minder as ’n week vier keer die kragopwekker by die rivierpompstasie na die Parys-rioolwerke beskadig het om stukkies koperdraad te steel.
Bo en behalwe die skade wat vuisvoos belastingbetalers en die sukkelende Ngwathe munisipaliteit moet betaal, loop riool as gevolg hiervan nou knaend by die Sandgat in Rotarylaan, direk in die Vaalrivier in.
Gazette het die afgelope paar weke berig oor die gevolge van rioolbesoedeling in die Vaalrivier en die kommer oor visvrektes .
Maar terwyl die diefstal van die koper deur die wet as ernstige oortreding gesien word, speel die misdadigers kat-en-muis. Met Gazette se ter perse gaan, was die jongste diefstal juis kort nadat sekuriteitswagte wat die pompstasie oppas, daar weg is. Teen 16:00 Maandagmiddag was die skade by die pompstasie herstel, maar vir hoe lank kan daar nog voortgegaan word om die skade te herstel?