In die individuele enkels-afdeling het Okkie van der Merwe uitstekend gevaar en die Dames Enkels-afdeling van die toernooi gewen toe sy haar opponente behoorlik onder die stof gespeel het.
Ockert Grobler het op sy beurt tot by die semi-finaal van die mans enkels gevorder, waar hy 1-2 verloor het teen Thabo van Bloemfontein. Ockert het egter die meeste voltalle (180’s) vir die toernooi gegooi.
Wat Okkie se prestasie so besonders maak, is dat sy verlede jaar eers begin het om veerpyltjies te speel.
Haar man Danie, is ’n kranige veerpyltjiespeler, en het ná ’n rusperiode weer begin speel toe die egpaar Parys toe getrek het.
Dit is hier waar die pyltjiegogga vir Okkie ook gebyt het.
Sy het vanjaar al verskeie mylpale bereik en was ook die dubbels wenner en lid van die span wat goud gekry het tydens ’n Vrystaatse toernooi in Harrismith.
Hierbenewens is sy die Noord-Vrystaat vrouespan se reserwe vir die nasionale kragmetings van 7 tot 14 Julie, waar Danie en Ockert ook die Noord-Vrystaat sal verteenwoordig.
