VANDERBIJLPARK. – Ses mans is Saterdagaand 19 Mei in die Spur in Frikkie Meyer-boulevard in hegtenis geneem weens die onwettige besit van perlemoen ter waarde van sowat R450 000.
Jannie du Plessis, misdaadverslaggewer van Vaalweekblad, het toevallig by die Spur gekuier en was op pad uit toe die polisie daar opdaag. Kaptein Tebeho Lephota, mediaverteenwoordiger van die polisie, het bevestig dat die mans in hegtenis geneem is en beslag op die perlemoen gelê is.

Beslag is ook gelê op twee voertuie waarmee die perlemoen vervoer is. Die voertuie was in die parkeerterrein van die sakekompleks geparkeer terwyl die mans geëet het. Die ses mans is almal van Kaapstad. Die perlemoen was nog ongekook en ongedroog. So is die waarde baie minder as die gekookte en gedroogde perlemoen. Die verdagtes is deur die diefstal-eenheid agtervolg tot by die Spur.

Volgens ‘n Vaalweekbladeser, Sylvia Bothma, wat tydens die voorval in die Spur was, het die mans by twee tafels naby die toilette gesit toe die polisie toegeslaan het. Hulle is met wapens in die rug na buite gelei. Die bestuur van Spur wou nie kommentaar oor die voorval lewer nie. Die ses verdagtes het reeds in die landdroshof in Vanderbijlpark verskyn.