Dr. Aaron Motsoaledi, minister van gesondheid het op Woensdag 8 Maart voorgestel dat die wetgewing oor die beheer van tabakprodukte streng aangepas moet word. Motsoaledi sê dat die tabakbedryf chaos veroorsaak en het sy haat teenoor die tabakbedryf by die Wêreldkonferensie oor Tabak en Gesondheid (WCTOH) uitgespreek.

Die nuwe wetsontwerp is in April deur die Kabinet goedgekeur en op 9 Mei in die Staatskoerant aangeteken met ʼn tydperk van drie maande waarin die publiek kan terugvoer gee. Hierdie wetsontwerp sluit ook vir die eerste keer die gebruik van elektroniese sigarette. Motsoaledi sê dat  elektroniese sigarette (waarvan die bekendste Vapes is) ook nikotien bevat en die langtermyn-gevolge van die sigarette is onbekend.

Hierdie is wat verwag kan word van die nuwe wetgewing op tabakprodukte:

• Rook in publieke plekke word geheel en al verban (binne en buite geboue).
• Rookareas in publieke plekke sal heeltemal afgeskaf word.
• Wanneer rokers buite rook, moet hulle minstens 10 meter weg van ʼn ingang van ʼn publieke plek wees.
• Geen handelsmerke sal meer op sigaretverpakking wees nie, slegs die naam van die handelsmerk en waarskuwingsplakkers sal op verpakking mag verskyn.
• Sigarette mag nie meer vertoon word in winkels nie en geen advertering mag meer by sigarettoonbanke verskyn nie. Sigarette moet iewers weggesit word waar die publiek dit nie mag sien nie.
• Sigaretmasjiene gaan heeltemal afgeskaf word.

Parys Gazette wil graag rokers en nie-rokers se kommentaar oor die nuwe wetsontwerp hoor. Stuur jou mening na gazettenuus@gmail.com