Die saak is reeds sewe keer uitgestel voordat dit Maandagoggend in die hooggeregshof begin het. Die weduwee van Koos van der Leeuw, Marietjie het eerste haar getuienis afgelê waarin sy een van die beskuldigdes in die hof uitgewys het.

Tydens kruisondervraging het Tefu Mohua, die beskuldigde wat sy uitgewys het, se regsverteenwoordiger gevra of sy met sekerheid kan sê dat sy kliënt een van die aanvallers was aangesien sy so getraumatiseerd was.

“Ja ek was erg getraumatiseer maar daar is niks fout met my oë nie,” het sy geantwoord.

Tefu Mohua, Samuel Motsi, Aida Lebaka en Bibi Nycamphalala word aangekla van onder meer moord en roof met verswarende omstandighede.

Die aanval vroegoggend by die Potchefstroomse slagpale op mnr. Van der Leeuw het skokgolwe deur die plaaslike gemeenskap gestuur.
Gewapende rowers het mnr. Van der Leeuw en sy vrou, Marietjie, omstreeks 06:00 by die slagpale oorval toe hulle daarheen gery het om ‘n kontant transaksie te beklink. Die rowers het sowat R77 000 kontant tydens die rooftog gebuit en mnr. Van der Leeuw in die kop geskiet, nadat hy een van die rowers geskiet het.

Marietjie het tydens die skietery in hul bakkie platgeval en gemaak of sy dood is. Sy was ongedeerd, maar die swaar gewonde mnr. Van der Leeuw het enkele ure later in die hospitaal gesterf.
Die rower wat hy geskiet het, is glo later in sy makkers se wegkomkar dood. Hulle het hom toe glo uit die voertuig gegooi, waarna die oorlede rower se familie ‘n lykbesorger betaal het om die liggaam te begrawe.
Mohua en Motsi is in 2015 op borgtog van R10 000 elk vrygelaat. Nycamphalala het nie om borgtog aansoek gedoen nie. Lebaka, wat geboorte geskenk het terwyl sy in aanhouding was, het verlede jaar vir die eerste keer om borgtog aansoek gedoen, maar is geweier.