‘n Bordeel in Klerksdorp  waar die Valke 26 vroue en meisies op 16 Desember 2016 gered het, sal binnekort gesloop word.

Die Valke se gespesialiseerde ondersoek (PCSI) eenheid het ‘n aansoek gedoen dat die gebou aan die staat verbeur moet word. PCSI moes bewys dat die eiendom uitsluitlik vir kriminele aktiwiteite gebruik is.

Die Valke het al twee klopjagte by die perseel uitgevoer, eers in 2016, waar 26 vroue en meisies  gered is en weer in 2017 waarna 34 vroue gered is. Tydens dié klopjagte is twee Nigeriërs  in hegtenis geneem vir mensehandel en besit van dwelms.

Die voorbereidings vir die sloping is aan die gang.

Gen. maj. Linda Mbana, provinsiale hoof van die Valke, het die nuus verwelkom.

“Na baie harde werk deur die Valke, die AFU en die NVG gaan die eiendom uiteindelik gesloop word. Ons hoop dat die sloping van hierdie eiendom die gemeenskap van Pienaarsdorp hoop sal gee, “het sy gesê.

Sy het alle betrokkenes verder bedank en die lede van die gemeenskap aangemoedig om misdaadaktiwiteite aan te meld.