Volgens ao. Mpho Manyoba, polisiewoordvoerder, het die eerste rooftog omstreeks 20:45 in Gerrit Dekkerstraat plaasgevind. Verdagtes in ’n wit voertuig het die slagoffer in die straat genader, waarna die passasier hom met ’n “vuurwapen” gedreig het. Hy is van sy selfoon en rugsak beroof en is geskiet voordat die verdagtes gevlug het.
Die slagoffer het toe besef dat die vuurwapen net ‘n gas- of lugaangedrewe pistool was omdat dit slegs ‘n kneusplek gelaat het.
Later dieselfde aand, omstreeks 22:30, is ‘n man op pad na sy woonstel in Steve Bikostraat ook deur twee mans in ‘n wit voertuig genader. Die passasier het die man vir padaanwysings gevra en daarna of hy sy selfoon kan leen. Hy het geweier waarna die passasier hom met ‘n vuurwapen gedreig het.
Volgens Manyoba word twee sake van gewapende roof ondersoek. Sy sê al was dit nie ’n volwaardige vuurwapen nie, het die slagoffers dit nie geweet nie en daarom is dit net so goed soos om ‘n regte vuurwapen op iemand te rig.
Die twee verdagtes het Donderdag in die hof verskyn op aanklag van gewapnde roof. Michael Cassim(21) en Riaagat Khan (26) bly in aanhouding. Die saak is uitgestel na Maandag 19 Februarie vir formele borgaansoek.