Potch-student kritiek met malaria

‘n Student aan Potchefstroom Akademie, Elmien Fourie (20), is op Oujaardsag met ernstige malaria gehospitaliseer, en is tans in ‘n kritieke toestand.

Elmien was saam met haar gesin in Evander in Mpumalanga toe sy op Oujaardsag siek geword het.

Elmien se pa, Manie Fourie, is ook die volgende dag in die Evander-staatshospitaal vir malaria opgeneem. Manie se toestand is egter meer stabiel as die van sy dogter, wat steeds nie uit ‘n semi-koma ontwaak het nie.

Elmien se ma, Natasja het vanoggend (3 Januarie) op Facebook laat weet dat Elmien se toestand nog dieselfde is, en dat sy skade aan haar niere en lewer gekry het.

Natasja, het ‘n hulpfonds gestig vir haar gesin, en kon teen Nuwejaarsdag genoeg geld insamel om haar man en dogter te laat oorplaas na MediClinic-privaathospitaal in Secunda.

Daar is ook ‘n ondersteuningsblad op Facebook vir Elmien gestig, waar familie en vriende hul gebede plaas naamlik Elmien Fourie Hulpfonds.