Mnre. Hans Nothnagel en Frik Grobler het ondersoek gaan instel toe die honde vreeslik begin blaf het, maar het niks vreemd opgemerk nie. Hulle is weer terug in die huis en het ‘n program op KykNet klaar gekyk, toe die honde weer begin blaf.

Hulle is na buite, waar hulle deur vier mans oorval is. Hulle is in die huis teruggedwing, waar hulle onderskeidelik in die kombuis en slaapkamer vasgebind is. Die rowers het op kontant en vuurwapens aangedring wat daar nie was nie.

Die rowers het hulle daarna met enigiets wat hulle in die hande kon kry, geslaan en geskop. Selfs die honde het deurgeloop. Hulle het daarna alles in die huis omgekeer en met die televisie, radio’s, selfone, juweliersware en selfs kruideniersware gevlug.

Nadat die mans weg is, kon mnre. Nothnagel en Grobler hulself loswikkel en hulp ontbied. Hulle is na die Germiston-hospitaal geneem vir behandeling.

Die polisie se forensiese span het die toneel vir vingerafdrukke en leidrade gefynkam, maar volgens inligting is niemand nog in hegtenis geneem nie.