Bankkaart-diefstal: Jy moet versigtig wees!
Die polisie waarsku weer Parysenaars dat bankkaart-diefstal steeds ’n baie groot probleem in die dorp is. Daar word gereeld sake by die polisie aangemeld waar mense se bankkaarte gesteel is by die OTM, en geld dan by ‘n ander OTM uit die slagoffer se rekening onttrek is. Verlede naweek is weer ’n geval aangemeld waar …
![](https://images.caxton.co.za/wp-content/uploads/sites/116/2017/02/AibKgbLET.png)
Die polisie waarsku weer Parysenaars dat bankkaart-diefstal steeds ’n baie groot probleem in die dorp is. Daar word gereeld sake by die polisie aangemeld waar mense se bankkaarte gesteel is by die OTM, en geld dan by ‘n ander OTM uit die slagoffer se rekening onttrek is.
Verlede naweek is weer ’n geval aangemeld waar die slagoffer by die OTM by die tak self geld getrek het terwyl daar slegs een persoon by die ander OTM doenig was en ’n ander agter hom gestaan het. Hy was reeds klaar met sy transaksie en het die geld en kaart gevat en geloop, toe een van die mans hom teruggeroep het en gevra het dat hy net sy transaksie kanselleer sodat die masjien kan voortgaan met die volgende transaksie.
Nodeloos om te sê – die skurke het in ’n oogwink die kaart gesteel en hul oog op die pinnommer gekry, toe die niksvermoedende kliënt terug is na die OTM om te doen soos gevra is.
Pasop dat mense nie jou aandag aftrek nie en let op die volgende wenke:
* Hou ten alle tye ’n ogie op jou kaart.
* Moet nooit vir iemand sê wat jou pinnommer is nie.
* Moenie jou kaart en jou pinnommer bymekaar bêre nie.
* Vermy swak verligte OTM’s.
* Sleutel net jou pin in wanneer die masjien dit versoek.
* Maak seker niemand hou jou dop terwyl jy jou pin insleutel nie.
* Staan naby aan die OTM en maak seker omstanders kan nie jou hand sien terwyl jy die pin insleutel nie.
* Maak seker jy hou jou hand oor die kaartgleuf om te verseker niemand neem jou kaart nie.
* Verlaat die OTM dadelik indien jy onveilig voel. Ook as daar baie min kliënte is – probeer later teruggaan as daar meer beweging is.
* Moet nooit hulp aanvaar nie – nie eens van ’n sekuriteitswag nie.
* Moenie toelaat dat iemand jou aandag aftrek terwyl jy ’n transaksie by ’n OTM doen nie.
* Maak seker die kaart wat jy gebruik is jou eie, voor en nadat jy ’n transaksie afgehandel het.
* Moet nooit jou geld by ’n OTM tel nie.
* Kanselleer jou kaart onmiddellik as dit verlore, gesteel of beskadig is of deur ’n masjien teruggehou word. Moenie toelaat dat iemand anders die oproep namens jou maak nie.
* As een of twee OTM’s in ’n bepaalde gebied nie werk nie, is dit beter om nie na die naaste OTM in dieselfde gebied te gaan nie. Kitsbanke word gereeld gesaboteer om slagoffers na ’n bepaalde OTM te lei.
* Indien ’n OTM of PVV-toestel beskadig lyk, die skerm niks vertoon nie, of dit lyk asof daaraan gepeuter is, moet jy dit nie gebruik nie.
* Verlaag jou daaglikse onttrekkingslimiet om te vermy dat misdadigers al jou geld steel indien hulle wel hul kloue op jou kaart kry.
Die belangrikste reël is om op ’n hoë gereedheidsgrondslag te wees terwyl jy ’n OTM of PVV-toestel gebruik. Indien jy enigiets verdag opmerk of ongemaklik voel, vertrou jou instink en beweeg weg van die masjien af.